Nöömst du in Elsfleth jichtenswo den Naam Horst Werner Janssen, denn warst du mit dat allerbest Loov överladen: Bunnesverdeenstkrüüz, Verdeenstorden van Neddersassen, Ehrenbürger van de Stadt Elsfleth, Vörsitter van den Nautischen Vereen, un he geev Stütt un Stöön för de Fackhoogschool för Seefohrt un Logistik. Daar weet een gaar nich, wo man begünnen un wo man uphören schall.
Aver dit is van Begünn an klaar: Horst Werner Janssen weer un is een Elsflether Institutschoon. Daarbi kummt he ut Oostfreesland, ut een bannig oold Kapteins- un Reederfamilje. Ok wenn sien Öllern een Bueree haarn, hüerde Horst Werner Janssen mit veertein Jahr as Schippsjung up een Dreemastschoner an. He woll dat Seefahrerhandwark van de Piek afan lehrnen. Söven Jahr later, 1954, keem he na Elsfleth. Daar woll he na de Seefahrtschool gahn un toeerst dat Stüürmanns- un laterhen dat Kapteinspatent maken. Dat heede aver nich, dat he in disse Tied nich up See ween kunn. In disse Jahrn föhrde he up den Schoner „Elisabeth“ van sien öllern Broer Heyo.
Kiekt wi us disse Tied in Elsfleth nip un nau an, denn is dat een Tied van groot Bedüden för sien Tokummst ween. Hier funn he sien Froo, in disse Tied begunn aver ok de Leevde to Elsfleth un de hett för sien heel Leven hollen. Bovenbott brengt aver de Sülvstännigheid van sien Broer em ok woll up den Smack, ok so wat uptotrecken.
1958, man jüst eben harr he sien Kapteinspatent in de Tasch, grünnt he in Elsfleth sien egen Rederee un köfft dat Motorschipp „Visurgis I“. Wieldat de jung Reeder fliedig, tofatend un toverlatig is, gaht de Geschäften good. Up disse Grundlaag kunn de Bedriev grötter maakt weern: 1962 löppt mit de „Visurgis II“ dat gröttste Hannelsschipp van'n Stapel, wat in al de Tieden in Elsfleth boot wurrn is.
Al een paar Jahr later hett Horst Werner Janssen bitieds de neen Teken van de Tied rutkennt: Jüst eben kemen an'n Enn van de 60er Jahrn de eersten Containerscheep na Düütschland, wuss Janssen, dat dat de Tokummst van de Hannelsschippfahrt weern schull. 1978 leggde he dat gröttst privaat Schippsbooprogramm up, dat dat bit daarhen in Düütschland geven harr. Warften in Flensborg un Emden hebbt em för över 200 Millionen Mark een Containerflott mit söven Scheep boot. Daarbi weer dat eerst de Begünn. Mehr as twee Dutz Neebooten kemen in Jahrn daarna daarto.
Daarbi weer dat Wark in sien Beroop bloot de een Siet van de Medallje. He kümmerde sik butendeem ok noch üm bannig veel anner Belang in sien Wahlheimaad, üm Kultuur, aver ok üm sozialn Angelegenheiden. In Elsfleth gifft dat woll nich een eenzig Inrichten, de Horst Werner Janssen nich bedacht, mit de he nich mitgahn oder ok an'n Begünn mit anstött hett.
Een besünners groot Wark weer dat Överföhren van de „Ariadne“ van Piräus na Elsfleth. De Ariadne weer een Gaffelschoner, de al een beten wat in de Jahrn komen weer. Janssen hett daarför sörgt, dat de Ariadne weer flott maakt wurr un as Schoolschipp van de Fackhoochschool för Seefahrt in Bedriev nahmen weern kunn. De Ariadne wurd up den Naam „Groothertogin Elisabeth“ ümdöfft. De „Groothertogin Elisabeth“, van de Elsflether vandaag ok geern „Lissi“ nöömt, liggt an de Kaje, as wenn se nienich woanners legen harr.
Horst Werner Janssen is sien Leven lang Minsch bleven, een Minsch de över de Maten veel leist un Erfolg hard hett. To sien 80. Gebortsdag hett he seggt: „Mien Leven weer för mi ümmer een grode Gaav, een Geschenk.“
Mit so een Instellen versteiht sik dat Delen denn van sülvens. Aver ok de Achtung, de em in'ne Mööt keem, weer ehrlich un wohrhaftig.
2017 is he mit 84 Jahr sturven un veel Minschen in sien Heimaadstadt Elsfleth un ümto hebbt mit deepe Truer daarup reageert.
De Spröök up de Steele an de Kaje in Elsfleth beschrifft noch eenmaal up besünner Aard un Wies dat Instellen un dat Levenswark van Horst Werner Janssen: „Hier ward nich bidreiht, hier ward nich refft, bit wi dat Ziel to faten hebbt!“