In Johr 1772 kreeg dei Buurskup Hammel ehre eierste Schaule. Dat Schaulgeld mössen domaols dei Öllern betaohlen. Dortau läwten uck in disse Tied nich naug Schäulers in Hammel. Dei Lehrer möss noch betaohlt wern. Dat wass `ne leipe Tied. At in Winter 1810 dei Lehrer Behnken dode bleew, nöhm Pastor Beckering dei Saoke inne Hand. Wat nu? Ein`n Schaulmester ut`n ännern Kespel nao Hammel hentaukriegen, was domaols nich möglick. Do har Pastor Beckering `nen gauen Infall. Hei schlög den jungen Wessel Meyborg at neien Lehrer vanne Hammeler Schaule vör. Wessel Meyborg köm ut Hammel un har all faoken den olen Lehrer Behnken in`n Ünnerricht ünnere Armste gräpen. Meyborg fraide sick all up dei Stäe. Fix schickte Pastor Beckering dei Ünnerlaogen nao sien Üppsten in Vechte. Dei läöt sick Tied, mächtig Tied. Hei wull ampart twei Fleigen mit `de Klappen schlaogen. Bi siene Karkenvisitation in Lastrup kunn hei jao uck dann den neien Schaulmester maol inne Mangel nähm`n. Wessel Meyborg har nu dann noch Tied naug, sick för dei Prüfung schlau tau maoken. Dat düerde un düerde Wäken un Monate. Kien Kind güng nao Schaule.
Endlick köm dei grote Dag. Wessel Meyborg lees dei klauken Fraogen mit Maithe dör:

1. Worümme schall kiener ein Schaulmester wern, eiher hei dortau düchtig is?
2. Wo schall ein Schaulmester mit siene Schäulers ümmegaohn?
3. Wat möt Kinner inne Schaule lern`n?

Man har wisse dortau masse schriewen kunnt. Aower Wessel Meyborg schreew dor bloß ganz kort wat hen, wat üm infüllt. Aower, wat för `n Glück, hei kreeg dei Lehrerstäe.
Läöterhin keek Pastor Beckering maol bi üm maol nao`n Rechten. Villicht was dat uck maol nödig. In sien Bauk schreew Pastor Beckering: Läsen gaiht so; Räken gor nicks; Religion kann hei woll wat. Un wieter: Räken leip, Religion gaut. Oh! Oh! Wat wedd ut sücke Kinner bi so ein`n Lehrer? Pastor Beckering häff wisse bi sick dacht: Bäter ein`n Lehrer inne Schaule häbben, at gor kien`n. Wessel Meyborg har at Schaulmester hartet Brot. Dartig Kinner in einen Klassenruum in Tögel tau holl`n un verseuken ehr wat för `t Läwen bitaubringen, dat kost`t Knäpe. Sess Johr häff hei dat dörholl`n. Dann bröchten dei Hammeler üm nao`n Karkhoff.
Un för Pastor Beckering füng dat Seuken nao`n neien Schaulmester van vörne wedder an.