„Dei Straoten glitt wieter un wieter, weg van dei Dörn wor sei anfüng.“ An `ne ännere Stäe sägg dei Dichter, dat dei Straoten uck wisse geföhrlick is. Wenn man Faut för Faut settet, kann `t angaohn, dat du, - aohne dat du dat marks- all an ännern Enn vanne Welt bis.
Straoten hört tau usen Alldag. Äöwer wi dröft nich vergäten: Straoten sind bequeme, faste Wäge. Straoten sind `nen Luxus, denn wi vanne Römer arwt häbbt. Straoten sind Verbindungwäge, sind Linien tüschken twei Stäen off Dörper, dei wiet van`nänner weg leegt. Disse Wäge, Äöwerlandwäge off Linien kann un mag et woll all inne Jungsteintied gäwen häbben. So eine Straoten is wisse uck dei bekannte Vlämische Straoten. Dei was ein Strang vanne Ostsei bit hen in dei Nederlande. In Middelöller güng sei van Lübeck äöwer Hamborg un Brämen, wieter nao Wildeshusen un Cloppenborg hen. Ungefähr, wor vandaoge dei B 213 verlöpp, güng disse Straoten wieter dör Lastrup un Läöningen bit in `t Emsland; dann wieter in`t Nederland bit endlick nao Antwerpen un Brügge. In Brügge har dei Hanse ehre meisten Waore laogert. Mit masse Handel uppe Straoten, wüdd uck masse Geld verdeint. Dorvan kreegen uck Wirtschaft un Handwark wat aff.
So wassen in 16. un 17.Johrhunnert bi us uppe Flämischen Straoten väle Wanderkooplüe ünnerwägens. Kooplüe ut Westfaolen handelten mit Kattun un Tüg för Kleeder. Landup, landaff sä man „Tödden“ tau ehr. Un kömen dei Kooplüe ute Gägend van dat nederländischke Kampen, dann sä man landup, landaff „Teuten“ tau ehr. Dei wassen wennig un häbbt sick mit dei Tied faoken wat Änneret infall`n laoten. Wecke verstünnen dei Falknerei. Ännerswecke köfften schönet, langet Hoor van junge Wichter, Derns, up. Dat wüdd dann düer wieterverköfft för Perücken. Dei wassen jao in 17.un 18. Johrhunnert grote Maude.
Dann wassen dor noch dei Kädelflickers ünnerwägens, wecke mangers dei hiesigen Handwarkers dei Arbeit wegnöhmen. Un dann geew dat noch „Spezis“, dei Kastrier-Teuten, dei Farken un Rindveih kastrierten.
Solange dei Postkutschken för den Waorenhandel uppe Flämischen Straoten ünnerwägens wassen, verdeinten dei Wanderkooplüe noch gaut Geld.
At allerdings dei Iesenbaohn bauet wüdd, güng dat mit den Wanderhandel so sinnig bargdaol un was langsaom up`n Enn.