In use Ollenboger Münsterland un inne Gägend van Wildeshusen giff dat hütdaogs noch masse gewaltig dicke Brocken van Steinen. Wecke sind sogor tau ein Hünengraff tauhoopestellt worn. Man fraogt sick, well kunn sücke groten Steine bewägen off verrögen. Dat möt woll Hünen (Riesen) wän häbben. Dorher kummp uck woll dei Naom: Hünengräber.
Bit vandaoge weit man doräöwer wenig. Man find `t kiene Teiken up disse Steine, so as in Ägypten. Aower disse Granitbrocken wassen wisse uck all vörher hier. Dei Mensken domaols häbbt disse gewaltigen Brocken bewägt un dorut ovale Hünengräber bauet. Van eine Siete was dei Ingang. Dor leggen sei dann uck noch an beide Sieten Steinbrocken hen. Hier wüdden tau dei Tied dei Doen begraoben un dat uck noch väle, väle Johre läöter. Dat mag sick aals woll so taudraogen häbben.
Et is beduurlick, dat wi doräöwer nicks naoläsen käönt. Wi wätet nicks äöwer den Globen un dei Kultur van disse Mensken. Aower in disse Hünengräber leggten sei Bigaoben. So kunn man ut dei tweibrockenen, lüttken Stücke ut Ton un Keramik doch wat utklamüsern. Dormit wät wi nu, dat dei Mensken domaols tau dei „Trichterkultur“ hörten. Dei mäöken Saoken för `n Gebruuk för aale Daoge, dei so utsehgen as `n Trichter. Faoken leggten sei sücke Trichter mit in `t Graff.
Dei Form van dat Oldendörper Steingraff sütt so ähnlick ut, at dei Steingräöwer günnsiet vanne Ems. Dat kann gaut angaohn, dat sick dei Menken domaols gägensietig holpen häbbt. Villicht harn sei uck eine besünnere Methode, disse Steine tau verrögen. So at dat in`t Middelöller bi den Bau van dei Kathedraolen uck was. Ein Koppel Handwarker har den Bogen rut.
Dat is wisse nich so licht, disse Brocken tau verrögen off sogor up`nänner tau staopeln. Taueierste mössen jao dei Steinbrocken deiper inne Ern. Dornao kunn dei nächste Brocken dorup settet wern. Man kann sick dat gaut vörstellen, wat dat woll för Knäpe kost`t häff. Bit vandaoge käönt wi doräöwer bloß spekuleiern un lange naodenken.