Wenn man över die Habens an Neddersassens Küste snackt fallt een Willemshaben, Bremerhaben oder ok Emden in. An Braak denkt´n ehr nich, man Braak kann mit de annern altomol mitholen. In Braak hebbt al Schepen fastmoakt, dor geev dat Bremerhaben oder Willemshaben meist noch gor nich. Anfang von 19. Joahrhundert  hett man hier een Habenbecken boht, dat is de hüütige Binnenhaben, un anne Kaje kunn´n de eersten Schepen fastmaken. Rundumto wussn denn ook gau de Pack- und Lagerhüüs ut de Grund. In een von disse Hüüs find se vondagen dat Schifffahrtsmuseum Unnerwerser, in dat Borgstede und Becker Huus. 1835 wurd Braak denn Freehaben und um den ganzen Haben woar een Tuun sett, meist as vondagen, man ut anner Grünnen. Dat weer denn 1932 woller toennen.

Vondagen is Braak een ganz modernen Haben mit beste Verbindungen in´t Achterland. Dat geiht mit Schepen över de Werser und Hunte, mit Lastwoagens över de Autobahn oder ok mit de Iesenbahn. De Pier hebbt se nochmal länger moakt so dat dor ok de ganz groten Dampers anlegen köönt und an Land töövt denn al riesige Kraans um al de Saaken an Land to heben. Hier weerd ok veele Deele för de modernen Windmöhlen umschlaan, de een landop und landaf immer mehr sehn kann. De Silos in Haben sind woll meist de gröötsten in ganz Europa und Lastwagens föhrt rund um de Uhr um al den Kraam wat dort lagert wat wieter to verdeeln.

In 2012 sind in den Haben so bummelige 7,5 Mio. Tunnen an Waren bewegt wuurn. Dat is doch al wat, nich?

Twüschen den olen und den neen Haben liggt noch ne lüttje private Pier wo se mit Öle und Fette hannelt. Fröher weer dat Wal- und Robbenfett und vandagen is dat meist Palmöl. Bi de Braker heet dat dorum ok blots immer „ de Fett“ wenn von den Deel von´n Habne snackt ward.

Joa, hier is al ganz moie wat los un wenn denn moal von den Habens anne Küst snackt ward schull´n Braak nicht vergäten.