Audio

Text

Johann Ludwig Clemens Wickel wohnde in Höökswiek up en Warf. As Erinnerung an hum raagt ok vandaag immer noch en Lindboom in d’ Himmel, de eens tegen sien Huus stunn. Intüsken steiht de Boom unner Naturschuul.
Dr. Wickel weer to sien Tied en echte Dusendsassa. Up de een Sied en Chirurg, un butendeem kien slechte, wieldat de Lüü blot Goods över hum vertellden. Up de anner Sied weer he avers ok en flietig Tüftler un Utfinner, de mennig Patenten up sien Naam anmellt hett. Butendeem harr he en Konzession as Sepenmaker un ok as Stell- un Raddmaker.
Dat weer avers blot de een Sied van sien Wesen. He was butendeem ok en fein Fent, de mit gode Raad nich blot bi mediziniske Fragen helpen kunn. He harr alltied en open Ohr, wenn hum een anvertroen dee, dat he in Geldsörgen weer un sük nich mehr to helpen wuss.
De Armenkass hett Dr. Wickel nettso faken mit grote Bidragen unnerstütt, wat hum butendeem en gode Ansehn inbrocht hett.
Dr. Wickel was traut mit Lücke Harms de Freese ut Jheringsfehn. Wieldat de beid avers leep laat binanner funnen harren, bleven se sünner Nakomen. Villicht weer dat daarum so van Bedüden för hum, dat man sük up hum besinnen sull. Denn he harr mit de Karkhoffsverwalten ofmaakt, dat dat Dübbelgrafft, dat he för sük un sien Froo köfft harr, tegen en Uppries nooit weer neei beleggt worden sull. So as ji sehn, is dat bit vandaag so bleven.
Butendeem harr Dr. Wickel doch een lüttje Fehler: He keem nich ut Oostfreesland! He weer in ’t Jahr 1786 in ’t westfälische Hamm to Welt komen. Wieldat he avers na Oostfreesland funnen harr un ok vööl Jahren van sien Leven hier verbrocht hett, wölen wi hum disse lüttje Schaa nasehn!