De Kark vör de wi hier staoht hett ehren Naomen von een dänischen König. Klingt verwunnerlich, stimmt ober.

As de Friedrichskark in´t 18. Jhd. Boat wurrn is hörde dat Ollnborger Land to dat Königriek Dänemark. Dat keem weil de Herrscherhüüs von Ollnborg und Dänemark teemlich mitnanner verbandelt weern. Un as denn 1667 de Ollborger Graf Anton Günter ohne Nahkoamen sturben is wurr dat ganze Ollnborger Land eersmal dänisch und weil de Landesfürsten ok de Baas von de Karken weern und to de Tied jüst Friedrich in Dänemark dat Seggen harr kreeg de Kark hier in Hammelwarden denn ok sien Naomen.

Vörher hett hier over ok so rund 400 Joahr all ne Kark stoahn, de harr ehren Naoamen von den hilligen St. Vitus und weer ut Holt und dat holt denn jo nich ewig. Und wiel de Kark sik dat leisten kunn hebbt se denn ne Kark ut Stehen boat. Binnen hefft se denn noch enkelte Deele von de oole Kark övernahmen, dor is ok een Schippsmodell  to sehn, een Teeken, dat se hier in de Gegend ok veel mit de Seefoahrt to doon harrn.

Interessant is ok de Karkhoff. Dor leegt ok eenige von de bekannten Braker begraben. Georg von der Vring is dorbi, de eenzige Ehrenbörger von Braak und ok Admiral Rudolf Brommy, de Baas von de erste düütsche Flotte.

Kik man över den Karkhoff henweg süht man een groten roten Turm, denn Waterturm in Hammelwarden mit över 50 Meter Höchte. Water kummt von dor all lang nich mehr und so langsam wat dat goode Stück ok so´n beten bröckelich. So richtig weet dor nums wat mit antofangen und ´n Barg Geld inne Hand nehmen um dat so richtig in Schuss to bringen mach ok nüms. Mal afluern, wat dor noch ut wat.