Rund üm Hemmelte vertellt man allerhand Späukgeschichten un van Späukerkraom mit Gespenstern. Un dat besünners in Winter, wenn dann nachts dei Wind huulte, dann aohnten aale, dat dei Wilde Jäger ünnerwägens was. Man hörte dann inne müskenstillen Luft dat Bläken van siene Hünnen un dat Blaosen van dei Hörner. Man schull üm bloß nich targen, bäter wiet ut`n Wäge gaohn.
Dortau kummp uck noch ein „gläuniger Kerl“, ein wittläpeliget, lüchtendet Gespenst van Suhle her. Dei gaiht dör Hemmelte un vertreckt sick dann in `t Mauer. Dat is dei Geist van `n Obristen Priggenspill. Dei häff in 30jöhrigen Krieg so masse Leipkeiten maokt, dat hei nu in sien Graff kiene Ruhe find.
Uck uppe Straoten van Hemmelte un ümtau geew dat immer wedder Späukereien.
Einmaol köm ein Fuhrmann mit sien Waogen inne Nacht van Staopelfeld her. Siene Fro seet näben üm up`n Waogen. Sei wassen ganz kommaudig an `t Schnacken un Vertellen. Doch upn ´maol wüdden dei Pere tidderig. Dei Fuhrmann steeg aff, nöhm dei Pere bi `t Halfter, geew ein Teiken an siene Fro, dei dunn uck affsteeg. Up ehre Naofraoge keek ehr Kerl se düster an un was heller kribbelig. Hei sä kien Biff off Baff. Bi Maondschien was rundümtau nicks Besünneres tau seihn. Eine Viddelstunnen güngen sei schwiegend näben den Waogen her. Worümme har ehr Kerl dat so ielig? Dei Pere markten dat uck all. Eierste, at sei äöwer dei Bäke nao Hemmelte hen wassen, do wüdden uck dei Pere wedder ruhiger. „Gott sei Dank!“ Nu füllt `ne grote Last van üm. At dei Waogen fäuherte, frög dei Fro: „Nu sägg eis, wat wör denn los?“ Mit groten Oogen frög hei trügge: „Häss du dann gor nicks seihn off markt?“ „Nee, nicks!“ Do frög hei wieter: „Uck nich dei witte „Gestalt“, dei wisseweg näben us in Chausseegraoben löp?“ „Nee!“ Up`nmaol was ehr ganz bange un schwummelig taumaue. „Ick seih dissen Späuk hier aaltied, wanneiher ick hier nachts vörbi mott. Uck ännere Fuhrlüe gaiht dat so. Mien Vader is deswägen einmaol mit vull`n Waogen sogor vanne Straoten affkaomen.“ Dei Fro keek nochmaols vuller Twiewel bange ümme, aower nicks was tau seihn. Do seghen sei all van wieten dei eiersten Hüser van Hemmelte un wassen nu beruhigt.