Vööls in ’t Leven van Wilhelm Hinderks Buhs is en Spegel van de Verhältnissen in Oostfreesland in dat 19. Jahrhunnert.
De Buhs weren en Familie van fixe Seefahrers un Reeders. Ok Wilhelms Bröör Jann harr dat wied brocht, he weer Kaptain van sien egen Schipp. Avers wat de Minsken in Lohn un Brood bringen dee, jankde to de Tied ok na en Bült Opfers. Jann bleev mit sien Schipp up See. He weer vermisst. Wilhelm nohm daaruphen ut Veranwoorden de Froo van sien Bröör Ettje un de lüttje Wilhelmina bi sük up. Na fiev lang Jahren wurr Jann ennelk för dood verklaart un Wilhelm dee sük mit de Wedefroo van sien Bröör tosamen. Se schunk hum noch veer Dochters un een Söhn.
De Ollste van hör gung later na Amerika, dat Land van de unbegrenzte Mögelkheiden, en Magnet för mennig Minsken ut en Land, dat domaals, so schiende dat, nich vööl Mögelkheiden beden dee. De Nakomen leven vandaag noch daar. Een van hör harr sük en besünner Naam maakt: Ub Iwerks (utproot: Ab Eiwerks), de 1901 in Kansas City geboren wurr. Egentlik heetde he as Söhn van oostfreeske Inwanderes Ubbe Ert Iwwerks, avers dat leet sük mit de engelsk Tungenslag woll blot stuur utproten. Ub Iwerks weer de eerste Teekner mit de Walt Disney tosamenarbeidt hett un – villicht ahnen ji dat al – he harr würkelk en grote Andeel an dat Erfinnen van de bekannteste Comicfigur överhoopt. Mickey Mouse is also – heel sünner Spaaß – en halv Oostfrees!
Aver nu torügg na Wilhelm. He hett daarför söörgt, dat all sien Dochters good unnerkomen sünd. Wilhelm bestunn daarup, dat se sük blot mit en Minske tosamendoon dürsen, de ok Kaptain weer.
Sien Söhn Heinrich hett he dat Seefahren verboden. De sük sörgende Vader wull de eenzig Söhn woll nich de stadig Gefahr utsetten, de disse Verdennst mit sük brengen dee. Heinrich is Buur worden un hett sülvst en egen groot Familie mit tosamen fievteihn Kinner grünnt.
Hele 97 Jahr is Wilhelm worden, en segent Oller, tomaal in Tieden, in de dat Leven meest noch en Bült stuurder weer as in dat Düütskland van dat 21. Jahrhunnert. Wat för en Sett! Up d’ Welt komen as Napoleon noch Kaiser van de Franzosen weer, doodgahn is he 1911, blot dree Jahr vör de Begünn van de eerst Weltkrieg.