Nee! Verstaoh mi nich verkehrt! Wenn man hier nao Lastrup kummp, dann kann man meenen, man is in Texas. Ein`n Cowboy mit Haut, dei up Rosiante, sien Perd ritt, sowat find man hier nich. Aower bäten häff Lastrup doch mit Texas, Dallas un Houston tau daun. Hier giff dat nämlick masse Ölge inne Ern. Inne 50er Johrn füng man an, dat „Schwatte Gold“ ute Ern tau pumpen. Dat wüdd immer mehr. Wor mehr Arbeit anfallt, dor bruukt man mehr Lüe. Un so verdeinten tau dei besten Tieden bit tau 600 Mitarbeiter in Lastrup bi dei Firma Mobil OIL AG, gauet Geld. Mobil Oil AG bruukte dei Mitarbeiters jao för Johre. Dei Firma baute ein ganzet Dörp mit Dubbelhüser. Dei sehgen aale gliek ut. Sei wassen einkennig. Dei Lastruper harn drocke för disse Siedlung ein`n neien Naom`n: Dat was dei „Ölgesiedlung“.
Dei Firma Mobil Oil AG häff uck dorför sorgt, datt inne Freitied dei Mitarbeiter sick up`n Sportplatz düchtig bewägen un spälen kunnen. Sogor ein Clubhuus häbbt sei bauet.
Hütdaogs sind dei Pumpen noch Dag för Dag heller taugange. Van dei 600 Arbeitsstäen sind bloß noch 10 dor. Nu markt man, wo daone sick dei Technik verbätert un ännert häff.
Väle van dei „Nei-Lastruper“, wecke inne 60er un 70 Johrn wägen dei Ölge hier hentrocken sind, sind bläwen, uck at dei „Ölboom“ tau Enn` was. Vandaoge sind dat echte Hiesige. Intüsken waohnt dei aale in ehre eigen`n Dubbelhüser.