Dat Leven van Berend Folkerts Geyken un sien Froo Antje is in ’t Gode as ok in Ungode eng mit dat regionaal Seefahrerbruukdoom verweevt. So as man an de upwennig Grafftstenen sehn kann, weren de Geykens kien arm Lüü. Al siet völe Generationen, torügg bit in dat 17. Jahrhunnert, bedreven de Geykens Schippfahrt, toeerst as Törfschippers, de över de Fehnkanalen de ofstoken Törf offahren deen, later denn ok as Küstenschippers un achterna sogaar up grote Fahrt na Amerika. As Reeder mit en hele Rieg van Schippen is Berend Folkerts Geyken dat düchtig good mitlopen. Butendeem bedreev de Familie en Buurkeree mit en egen Hoff. He un sien Froo Antje wassen Ollern van tosamen söven Kinner, veer Dochters un dree Jungs, avers een van de Kinner is en paar Daag na de Gebuurt stürven.
De beid anner Jungs fuhren to See, Bernhard, de jungerde van de beid, vertellt in sien Uptekens, dat he överhoopt kien Lüst harr, de Familientradition natokomen. Avers nadeem he de School mit 14 Jahr ofsloten harr, hebben sien Ollern hum so drängt, dat he nich anners kunn. So hett he sünner Lüst up de „Flora“ anhüürt, up de sien ollerde Bröör Heye Kaptain weer. Villicht harr he ok al wat ahnt van dat, wat hum geböhren sull. Se fuhren na Norwegen, wieldat se daar en Laden Holt mitnehmen sullen un kwemen in en swaar Störm. Dat Schipp sloog Leck un de Mannskupp muss sük bi hoog Bulgenslag in dat Reddensboot flüchten, en Nöötschaal, mit dat se sük nettakkraat so över Water hollen kunnen. To ’n Glück wurren se van en Dampschipp ut Danzig reddt. Mit dat Schipp gung dat toeerst na London, ehrdat se torüggreisen kunnen. Na disse Beleevnissen weer Bernhard heel un dall de Lüst an de Seefahrt vergahn. He bleev nu lever up de Hoff van sien Ollern, de he bewarksteden dee. Man sien Bröör Heye gung weer up grote Fahrt, ditmaal mit de Schoner „Adele“. In ’t Jahr 1888, blot een Jahr na dat Malöör mit de „Flora“, weer Heye unnerwegens up de Atlantik. He hool en Laden Geelholt to Farven van Stoffen ut Venezuela mit dat Ziel Falmouth an de Tofahrt na de Ärmelkanaal. Daar gungen dotieds faken de Bestellens hen, so dat man up de Overfahrt noch heel nich wuss, well in Europa belevert worden sull. So wurr toeerst Falmouth anfahren, um daar de Örder to kriegen. Bit Falmouth is de „Adele“ avers nooit komen. Se is up See bleven, un Heye kweem nich na sien Ollern torügg. Wo slimm disse Verlüst west is, lett sük noch vandaag an de Grafftsteen van Berend un Antje Geyken oflesen, wieldat de Achtersied nix anners is as en Denkmaal för de Schoner „Adele“ un för de hör Kaptain mit sien heel Mannskupp. Trotzdeem is de Familie, wenn ok dat Malöör passeert is, de Seefahrt troo bleven. De Ur-Ur Enkel van Berend Folkerts un Antje Geyken is de bekannte Elsflether Reeder Horst Werner Janssen.