Audio

Text

Hier tüsken Kneihm un Schnelten, dor giff dat `ne ganz gruuselige, wunnerlicke Stäe.
Wunnere di nich, wenn nachts in Pickdüstern dei Geister van dei Armen Seelen dor schwäwt. Villicht driff sick uck noch dei „Weddergänger van`n Ruchlosen“ van fräuher hier herümme.
Uppe groten ringförmigen Anlaoge vanne Bleiborg, dor läwte fräuher ein ganz leipen Raubritter, ein Undäögt. Hei was tückschk un grausaom. Inne ganzen Gägend luurte hei dei Lüe up. Kienein was för siene Schergen sicher. Dei Lüe passen heller up, dat hei ehr nich tau packen kreeg. Dat glückte aower mangers nich. Eines Daoges harn dei Lüe dei Schnuuten dorvan vull. Sei luurten üm up. Sei spionierten üm nao. Un würklick. Sei fünnen friske Spauern vanne Pere. Mäutig un strammweg jüchterten sei achter üm her. Sei harn üm all inne Künne. Aower krägen häbbt sei üm nich. Wedder und wedder häbbt dei Lüe dat versöcht. Mit dei Tied geewen dei Lüe dat tau. Bit vandaoge weit kienein un nargnswor staiht dat up Papier, dat sei den Undäögt van Ritter tau packen krägen häbbt.
Wecke häbbt aower naoher vertellt, worümme dei Ritter ehr immer dör dei Latten gaohn is. Hei was jao schlau un tückschk. Hei markte jao alllange, dat sei achter üm her wassen. Do häff hei dat Iesen ümmedraiht un so siene Pere beschlaogen laoten. So güng dei Spauer vanne Pere alltied inne verkehrte Richtung. Dei Lüe häbbt dat lange nich market.
Na? Kann man disse Geschichte glöwen? Is dei wohr?
Off sei wohr is - off nich: Dei Bleiborg bliff gruuselig. Ein Erdring rundümtau was eine Höchde, eine Landwehr. Dei Ritter wassen so vanne Haose in Süden bit hen nao dat grote Mauer in Norden, alltied sicher. Dor kunnen sei sick verhulken un scheiten, wenn sei äöwerfall`n wüdden. Wo olt dei Bleiborg nu würklick is, weit kienein. Wisse häbbt sick dor vör Johrhunnert mangers wecke versteckt. Kriege geew hat domaols fäökener.
Dei Bleiborg leeg jao ganz versteckt inne natte Gägend un was nich licht tau finnen. Un wenn frömde, wilde Soldaoten inne Gägend wassen, dann kunnen sick dei Lüe dor drocke mit Kind un Kägel inne Bleiborg verstecken. Villicht häbbt sei uck noch ehr Veih mitnaohmen. So was wisse dei Bleiborg dei beste Stäe för ehr.