Joa, dat weern noch Tieden as se hier Schepen boot hebbt. Ne ganze Reeg von Werften geev dat domals – so vor rund 200 Joahr - und een dorvan weer de Oltmanns Werft. Hinrich Oltmanns keem ut ne Familie de al langn Schepen boode un verstunn sin Handwark allerbest. Hier an de Werser is he denn lütjet anfungen und laterhen har he ne ganze Reeg von Helgen hier to liggen. Helgen, dat weern de Plätze an´t Woater wo de Schepen boot  wurrn. So eene Schrägde wo de Schepen tosamen timmert wurrn und wenn se denn fertig weern rutschden de op Balkens int Woter. Und wenn denn laterhen so een Schipp mol twei gung kunn dat hier ok flickt weern. Denn muss so een Schipp na Oltmanns to´n „Kiellichten“.

Dat seggt se nix, wat?  So een Schipp wurr denn an een Dalben fastmoakt. Dalben, dat sind de Pohls de ut´Woater kiekt  wo man de Schepen an fastbinnen kann. Mennigmol sind ok or dree von disse Pohls zusammen bunnen, dat sind denn de Duc´Dalben. Wenn dor denn een Schipp fastmoakt weer kunn man dat in de Schrägde tehn und an de Stäen arbeiten de anners unner Woater weern.

As man denn laterhen anfung de Schepen ut Iesen to boen dor gung dat mit de Werft von Hinnerk Oltmanns so sinnig den Barg daal und runde 100 Joahr na de Gründung geev dat de Werft denn nich mehr. Dor, wo moal stahn hett kann´n sik nu moie verhalen un op´t Water kieken und in dat Museum gifft dat´n  Modell wo een sehn kann woans de Werft to ehre beste Tieden moal utsehn hett.