At lessde Buurskup kreeg 1910 Schnelten `ne eigene Schaule, dei besünners moje utstaffeiert was. Domaols ein Henkieker för Schnelten! Einer häff dorför `nen Batzen Geld up`n Dischk leggt. Dat was Heinrich Haker, nämlick 12.500 Mark. Hei was tau dei Tied dei gröttste Buur in`n Dörp. Dat Geld was gaut anleggt. Schnelten har nu eine schnuckelige Schaule. Aower dat geew bloß ein Klassenruum för aale Kinner. Dat güng dor kommaudig tau, har aower nicks van Romantik.
Siet dei 60er Johrn in 19. Johrhunnert kunn ein Schauljohr eierste dann deilt wern, wenn äöwer 50 Kinner in ein`n Ruum wat lern schullen. Denk maol: Füfftig Kinner van`t eierste bit achte/nägnte Schauljohr. Do bruukten dei Schaulmesters aower Nerven at Draohtseile. Mangers hülp dann uck noch bloß dei „probatische pädagogische“ Rohrstock. Aower Gottseidank, is dat nu för Schäuler un Schaulmesters vörbi.
Dei Dörpschaule in Schnelten mott würklick kommaudig wän häbben. Kiene 50 Kinner güngen dorhen.
Un dei Schneltener Schaule har noch wat Besünneres: Direkt in dat Schaulhuus waohnte uck dei Lehrer. Hei har den köttesten Weg nao Schaule!
Mit dei Flüchtlingskinner nao`n tweiten Weltkrieg wüdd dei Klassenruum vuller. Eine Tiedlang har Schnelten nu twei Klassen.
Dei lessde Lehrer anne Schaule was Lehrer Krogmann. At hei 1944 at Soldaot entlaoten worn is, köm hei an dei Schnelter Schaule. Off hei sien scharpen Ton ut siene Soldaotentied eierste noch bäten bibeholl`n häff, wätet bloß noch dei Schäulers van domaols.
Schaulmester Krogmann was ganze 25 Johr anne Schaule. Et was ein gauet Mit`nänner un Utkaomen. At hei 1971 in Pension güng, was dat uck mit dei Schaule in Schnelten ute. Dei Kinner ut Schnelten güngen nu nao Lastrup un Molbargen nao Schaule.
Ut dei Schaule häbbt dei Schnelter ein schnuckliget Dorfgemeinschaftshuus maokt. Väles häff sick in dat Schaulhuus ännert. Aower dei ole Schaulklocken schlögg noch Dag för Dag middags üm Twölwe.