Wecker Anfang van `t 20. Johrhunnert in Lastrup krank wüdd, för denn was dat leip. Ein Dokter köm bloß einmaol inne Wäken. Hei har kien`n Praxisruum. Nee, aals spälde sick in`n Staomd vanne Wirtschaft aff. So kunn dat domaols aower nich bliewen. Un so plaonte man 1910 ein Krankenhuus tau bauen. Vörsitter was dei Vikar Otto Beckmann. Up ole Fotos kanns üm fortsen mit sienen kloren Blick kennen. Aower nich bloß doran. Hei was so lang at breit. Achter dei Hand schnackten sei dann van „Kugel-Otto“. Aower dei Lüe wüssen genau, wat sei Gauet van ehrn gautmäudigen Vikar harn.
Nao drei Johrn was dat Krankenhuus fardig un wüdd inweihet. Do häbbt dei Lastruper sick mächtig affteiert un mitholpen un mitanpackt. Dei eierste Dokter was Dr. Ernst Stricker. Hei was düchtig un har sien Hart för siene Patienten uppe rechten Stäe sitten. Mangersmaol häff hei Patienten behandelt, uck wenn dei siene Räknung nich betaohlen kunnen. Vörher was hei all 1913 Dokter bi dei Soldaoten. För Volk un Vaterland kunn hei sick uck begeistern. At hei at junger Dokter in`t Berliner Charite arbeitete, häff hei ein Ooge up dei Krankenschwester Gertrud Curth ut Ollenborg schmäten. Dei beiden häbbt hieraotet. Gertrud Stricker geb. Curth was Halwjüdin.
At dei Nazis dat in Dütschland tau säggen kreegen, har Dr. Stricker ein echtet Problem. Up wecker Siete schull hei sick stellen? Hei har grote Twiewel. 1934, also ein Johr nao Hitlers „Machtergreifung“, wüdd hei Gruppenleiter van Lastrup. Hei häff wisse up twei Schullern draogen. Uppe einen Siete möss hei jao uck an siene Fro denken, dei Halwjüdin was.
At dei tweite Weltkrieg vörbi was, nöhmen dei Briten Dr. Stricker, als „Funktionsträger der NSDAP“, gefangen. Kort dornao wüdd Dr. Stricker so krank, dat hei in `t Militär-Lazarett möss. Ende 1945 köm hei wedder nao Lastrup; ditmaol sülwes at Patient in `t St. Elisabeth Stift. Kiene twei Johr` läöter bleew hei dode. Dr. Stricker häff wisse masse för dei kranken Lastruper daon. Aower dat hei inne NSDAP einen Posten har, häbbt väle Lastruper nich vergäten.
Dat St. Elisabeth-Stift häff aower noch einen düchtigen Dokter dortau hat, einen Chirug, dei inneTürkei geboren is. 1970 köm hei mit Familje nao Lastrup. Siene lüttke Dochter Özlem was ein ganz besünners klauket Kind. Et hett mit ehrn Huusnaohm: Türeci´. Tausaomen mit ehrn Kerl, Ugur Sahin, bauten sei dei Firma BioNTech up. Inne ganzen Welt sind dei Beiden nu bekannt, weil dei den Impfstoff gägen dat Corona-Virus utfunnen häbbt.