To sien Tied was Heye Kriens Buss in Warsingsfehn en würkelk achtbaar Minske! Dat he Kaptain wurr un lesterhands sogaar langjahrig Oortsvörstand, was hum heel nich in de Weeg leggt worden.
Heye wurr 1836 in Jheringsfehn geboren. Eerst laat kunn he regelmatig na de Volksschool gahn, de he in ‘t Oller van 14 Jahr ok al weer verlaten hett. Mit 21 hett he sien Patent an de Seefahrtschool in Leer kregen. Sien schriftlich Nalaat ut disse Tied is würkelk wat heel besünners, vör all wiel he ja neet heel lang na de School gahn kunn. Över vööl Sieden weg sünd hier grote swingende Riegen to lesen, de so ördenlik, slank un mooi utsehn, dat in d’ Vergliek daarto mennig Gymnasiast van vandaag ofgünstig worden kunn.
Heye Buss kweem in de Seefahrt good vöran un wurr ennelk Kaptain. En besünner Begevenheid ut disse Tied bericht daarvan, wo he mit sien Schipp „Wilhelmine“ in de Düütsk-Franzööske Krieg van 1870/71 bold van de franzööske Marine upbrocht worden was. Man mit Glück un Slag hett he dat schiert kregen, dat he sünner Schaa in en engelsk Haven Schuul söken kunn.
Schoons he in de Tied in sien Beroop so good vörankweem, geev dat in de Familie so mennig Daalslag. Dat kann een vandaag noch up de Grafftsteen lesen: 1869 bleev de lüttje Söhn Kriene dood, he wurr man blot good een Jahr old. 1875 is sien Froo Antje stürven, se wurr blot 39 Jahr old.
Man Heye mook wieder. Sied de 1880er Jahren gung he nich mehr up grote Fahrt, man he övernamm, to ’n groot Deel ehrenamtlich, Upgaven in dat egen Dörp Warsingsfehn, waar sien Huus noch vandag in de Postweg steiht. He wurr Oortsvörstand un Standesbeamter. In Warsingsfehn wurren de Ehen also nich blot in de Himmel, man ok in de Amtsstuuv van Heye Buss sloten, de natürelk in sien Privathuus weer, denn sowat as en Raadhuus gaff dat dotieds noch nich.
En heel Bült Jahren wahrde he ok de Interessen van de Warsingsfehntjers na buten, to en Bispill as dat daarum gung, de Depen un Kanalen so uttoboen, dat Schippen daar alltied upfahren kunnen. Lesterhands wassen de Kanalen för de domalig Fehnsiedlungen de Straten un Verbindungsstrecken nich blot na de Naberskupp, man ok auch in de grote wiede Welt.
Bit 1919 bleev Heye Buss Oortsvörstand, daarna övergeev he na bold 40 Jahren Dennsttied sien Amt an Harm Weber. De Amtsunnerlagen un belangriek Dokumenten wurren daarto heel passend in en Boot överföhrt.
En Portraitfoto ut dat Jahr 1923 wiest Heye Buss as en heel uprecht Mann, ok wenn he do al old weer. Haar un Kaptainsbart sünd witt un dünn. Man de Ogen sünd, tomaal för een 86-jahrig Mann, anmarkelk wacker.
1928 is Heye Kriens Buss na lang un beweegt 91 Lebensjahren stürven.