Wat sägg man so dör`n Dag: Schaulmesters häbbt dat gaut: Vammdaogs häbbt sei dat Regiment inne Schaule un nommdaogs frei.
So häbbt sick dei Hamstruper dat uck woll dacht, at sei 1797 den Lehrer Berend Wessel instellt häbbt. Dei wüdd tau disse Tied vanne Hamstruper betaohlt. Un dei wassen org kniepig. Berend Wessel waohnde in Lastrup un fäuherte jeden Morgen `ne halwe Stunnen mit Rad nao Hamstrup. In Winter köm hei mangers gor nich an, wenn dei Mühlenbäke tüschken Hamstrup un Lastrup taufrorn was. Un mit natte Bücksen wull hei uck nich inne Schaule sitten.
Do wull Schaulmester Wessel gern in Hamstrup waohnen. Mit ein lüttket Hüerhuus was hei taufräe. Aower dei Hamstruper rögden sick nich. Et passeierde nicks.
1809 schreew Pastor Beckering dat in ein`n Breiw nao Oldenborg. Nu bewägde sick mächtig wat. Dei Kommission ut Oldenborg was spinnedull, äöwer dat, wat sei tau hörn kreegen. Fortsen was uck in Sommer Schaultied, nich bloß ein halwet Johr. Den Schaulmester stünd ein Huus dichte bi dei Schaule tau un uck mit Gorn.
Dat köm Lehrer Wessel gaut taupasse. Hei kreeg sien Huus und dö dat ganze Johr Schaule, nich as vörher bloß ein halwet Johr. Nu mössen dei Hamstruper dubbelt Geld an üm betaohlen. So kunn hei gaut läwen.
Dei Kommission ut Oldenborg räkte aower mit Gägenwind. Sei wüdden süss dei Schaule in Hamstrup taumaoken, wenn dei Hamstruper dor gägen wassen. Dann mössen dei Kinner aale nao Suhle tau Schaule. Un dat wull kiener.
Un dei Kommision har uck up`n Schaulmester Wessel ein Ooge. Hei möss wiesen, dat hei ein önnlicken Lehrer was. 1817, also 20 Johr läöter, do möss hei nochmaol eine Prüfung maoken. Dei schall hei bloß mit 3- minus bestaohn häbben. Religion schall grottenschlecht wän häbben. Aower dei Pastor Beckering sehg dat ein Johr läöter total änners. Hei was gnädig un har nicks uttausetten. So wedd dat vertellt.