Ach jee, de Lappan. Weckern an Ollenborg denken deit, de denkt meist forts uk an den Lappan, dat Kennteken van de Stadt. De Lappan hett nich immer so heeten un uk nich so utseihn as vandaoge, man de Ollenborgers hebbt jümmers nao em keken. Af un an schullde de Lappan afreten weern, man alltied hebbt de Lüe in de Stadt sik wehrt. Anners wüdd us nu uk reel wat fehlen. 1667 is meist de heele Stadt afbrannt. Dat un stuure Tieden hebbt dat meiste van dat middelöller Ollenborg unnergaohn laoten bit up hier. All 1300 hebbt de Lüe hier een Stift för Arme inricht un daortegen een Kappell upstellt. Veele Lüe – jüs uk de ut de Neistadt bünt van daor an nich mehr bit St. Lamberti gaohn. ´Nen paor Jaohrteinte löter is all een Glockentorn baut worrn. So is et kaomen, dat de Lappan de öllste Karktorn in de Stadt is, wat jedereen em anseihn kann. Kappelle un Stift was nao den Hilligen Geist neumt, so hett uk de Stadtmüüre hier Hilligen-Geistwall , wat bit vandaoge de Straotennaome is. In de Tied van den krawalligen Graf Gerd was de neie steenen Karktorn jüs pass, de Stadt tegen de Mönsteraner, de Friesen un de Hanse tau verdefenderen. De Kappelle un dat Armenhus hebbt de Tieden nich överstaohn, as de Abt van´t Kloster Rastede in de Gaststraote een Gasthuus har, wat mehr een Unnerdack för Lüe sünner Geld för een Unnerdack was. Nao de Reformation was een egen Kapell för jedeen Hilligen nich mehr nödig. De Glockentorn mit de Uhr överlevde de Jaohrhunnerde tauhope mit dat Hüsken an sien Siet. Disse Hock wöör al lang Lappan neumd. De Ollenborgers vertellt, de Naome kump van lappen, wat tauhope neien, flicken bedüd. Meistieds ropd de Lüe een Öckelnaomen – so as bi Döchtnix of Schluffhack. Jüs so heppt se dat bi een Packan of eben Lappan maokt, de de Torn an de Kapelle anflicken dee. 1909 wöör dat Hüsken afreten un een reelet Hus baut, man de Naomen klefde al lang an den Torn un bleff daor an hangen. Of dat so richtig is, dat weit bit vandaoge kieneen.