Naja, Braak is nich just dat Zentrum vonne Welt und ok nich de eene Stadt an Nord- oder Ostsee. Dat will hier ok nüms, man dat maritime, dat gifft dat hier ok, blots allens n´beten ruhiger und besinnlicher.

Just hier an de Mitteldiek- und Lindenstroat gifft dat  noch veel von de vergangene maritime Tied to sehn. An manche Hüüs stoaht noch die olen Firmenschilder, faken op ingilsch dat ok de Lüe ut`Utland dor wat mit anfangen kunn. Bi de Firma Arnold kann man dör´t Finster kieken und vandaag noch de ole Ladeninrichtung sehn. Veel is vondagen aver ok nich mehr dor; Seilschepen givt dat al langen nich mehr und Taumoakers  ok nich mehr.

Dat dat hier ne Habenstadt  wurrn is hett ok veel mit de Bremers to doon. Fröher weer de Werser veel sandiger und lang nich so deep as nu und veele Schepen kunn´n gornich bit na Bremen henkoamen. De hebbt ehre Waren  för Bremen denn hier afloadt und över Land gung dat denn wieter. So kemen hier veele Lüe tohoop de op jichtenseene Aart mit Seefahrt und allens wat dorto höört to doon harr nun so wurd ut de Siedlungen Braksiel und Harrien de Stadt Braak und de Krüzung von de Linden- und de Breede Straot weer dor mittenmang.

De Fassaden von de smucken Hüüs kann man vondaag noch bewunnern.

Dat harr jo moie so wietergahn kunnt wenn dat nich irgendwann de Bremers to umständlich wurrn weer und de sik no een eegen, gröteren Haben umkeken harrn. Noch wieter na de Nordsee to hebbt se Land kofft und denn 1827  Bremerhaben gründ. Dat weer n´Schlag för Braak und dat bruukte ne lange Tied sik dorvon to verhalen. Aver een Haben is hier immer bläben und de enkelten Habens hefft sik op bestimmte Waren spezialisiert und vandag is ok in Braak immer noch bannig wat los.