Dei St. Michael-Karken staiht inne Midde van Kneihm un is baulick wat ganz Besünneret. Sei is gaut 200 Johre olt. Van ehr kann man allerhand äöwer dei Baugeschichte naoläsen.
Dei Lüe van Kneihm bauten 1801 ehre eiersten Karken. Dat was eine Fachwark-Karken. Dat Fachwark hüllt nich lange. So köm inne Midde van `t 19.Johrhunnert ein Utbau mit Steinen un dat Dackriehertörnken dortau. Inne nächsten 150 Johr häbbt dei Kneihmer immer wedder ehre Karken ümme- un anbauet. Uck van binnen is sei recht anseihnlick. Denn wunnervullen Klang van dei wuchtigen Örgel kanns hütdaogs noch hörn un erläwen.
Dat dei Kneihmer recht fromm wassen, dat sütt man uck doran, dat sei masse för ehre Karken daon häbbt. Kneihm was jao man ein ganz lüttket Dörp.
So wedd vertellt, dat et bi aal dei frommen Kneihmer uck dat eine off ännere schwatte Schaop gäwen häff.
Man vertellt: Ein Buur ut Kneihm güng wisseweg mit sien` Knecht hen nao Hemmelte taun Kortenspälen. Nich ümsüss sägg man tau dit Kortenspill uck: „Düwels Gesangbauk“. So bleew dat nich ute, dat sei bit deip inne Nacht an `t Korten kloppen wassen. Faoken naug kömen sei gor nich nao dei Misse inne Karken hen.
Einmaol, dat was `ne Nacht vör den hill`gen Sönndag, do möken sick dei Kortenspälers kort nao Middernacht up`n Weg nao Huus tau. Dei Sterns wassen an `t Blinzeln. Dei Kortenspälers wassen heller gaut taufräie un kömen dicht bi dei Grenzbäke tüschken Hemmelte un Kneihm an. Do hörten sei ein luutet Knurren. Up`nmaol stöw ut `n Pickdüstern ein groten, schwatten Hund up ehr tau. Dei Kerls verjäögen sick bannig un zackenaiten los. Sei markten, et gaiht üm Läwen un Dod. Dei grote Hund jüchterte dicht achter ehr un kläffte aalemantau: „Pik is Trumpf! Pik is Trumpf!“ Dei Kerls peesten nao dei Brüggen van dei Grenzbäke tau. Dor wassen sei sicher. Dei schwatte Hund kunn nämlick woll nich äöwer `t Waoter, wat flöt.
Off dei Kortenspälers jemaols wedder nao Hemmelte gaohn sind, is tau betwieweln. Wisse is jedoch, so wedd vertellt, dat dei grote, schwatte Hund sick immer noch nachts in disse Gägend rümmedriff.