Weet Se wat een Brassica oleracea varietas sabellica is? Nee, weet Se nich? Dat is de botanisch Nööm för Grönkohl. Un de speelt in Ollnborg een ganz besünner Rull! Denn de Stadt is siet 2010 „Kohltourhauptstadt“!
Wat een Kohltour is, dat weeten Se seker! Dat heet in de koole Johrestied mit een Bollerwagen in Seelschoop unnerwegens to wesen, um denn achteran abends tophop pück in een Lokal „Kohl un Pinkel“ to äten. Man ehrder Se nu een Schreck kriegen doot: Disse Pinkel-Wust is natüürlich kien besünnern egen afsünnerlich Smack, dat is een deftig Grützwuss, de de Kohl neben Mettwüss un Kassler de richtig Stevigkeit gifft. Un wieldat dat Ganze tohop tämlich mächtig is, gifft darto, ok gern mal vörweg, de een oder anner Snaps, de, wenn he traditschonell geven warrt op een Zinnlepel serveert warrt. Un dormit sünd wi ok al bi dat egentliche Thema, denn de Kohltour is nich bloots dat, wat man vandag een „Event“ nöömt, man in meenig Betreck (Hensicht) redig Utdruck von traditschoonel Kultur hier in’t Ollnborgsche un umto. Glövt Se nich? Ik bewies Se dat! Harrn Se to’n Bispill dacht, dat dat Boßeln, de Volkssport, de op een Kohlfahrt gern bedreven warrt, Wuddeln bit in de Tied van de Germanen hett? Vandag smitt een de Kugel bloots sowiet as man geiht de Straat lang, fröher schoten de Freesen mit hart backte Erdkugeln, nederdütsch ‚Kluten‘ op römisch Legionäre. Weer Arminius also een Frees wesen, weern de Römer dör Klootscheten, de Utgangsform van‘t Boßeln besiegt wurrn. Ok weet man in Ollnborg, dat dat as Teel för een Utflug winterdaags Kohläten hier al siet 200 Johr gifft. Disse Traditschoon warrt op de een Siet levt, man op de anner Siet ok jümmers woller op nee Aart un Wies utlegt. Ollnborg kennt to ‘n Bispill den Grönkohltee oder ok de Grönkohlpraline. Ollnborg hett sogar een Grönkohl-Akademie, de Se in ‘t Internet besöken köönt.
Wat Ollnborg bit nu noch nich hett, un dormit hadert man hier düchtig, is een egen Grönkohlsort, de Ollnborger Palme, dat Prunkstück, de Gipfel van al dat, wat een Frünn van’nen Grönkohl sik man wünschen kann. Man ok disset Problem geiht man middelwiel mit Utsicht op Erfolg an: De Universität un ehr Botansch Garrn sünd darbi ut de 50 verscheden Sorten van Grönkohl, de dat gifft, een perfekt Mengsel ut Smack, rieklich Nährstoffe, de de Schadenmaker nix andoon köönt un de hier bi us to Huus plant weern kann to tüchten. De Brassica oleracea cultivarietas Oldenburgia!
Weer dat nich wunnerbor?!