Anton Witte, Lastrup, dat sind dei Initialen van den Firmennaom`n „Awila“. Dormit fang eine finnige Geschichte in Lastrup an. Awila häff in Lastrup uppe richtigen Stäe bauet un gaue Arbeit maokt. Wat disse Firma affläwerte, dat was solide. Up disse Firma kunn man sick verlaoten. Sei kunn mit ännerswecke uppe ganzen Welt mit ehre Produkte gaut mitholl`n. Anton Witte was ein `n fixen Kerl, wortau man hütdaogs „Self-made-man“ woll sägg. Hei was ein Originaol van Lastrup. Aale kennen üm an sien groten Haut un an siene krägelige, pfiffige un fröndlicke Aort. Aaltied hörde man van wietem sien`n Terrier luut kleffen, mangers meilenwiet.
Ganz lüttket, plietsch un sinnig is hei anfungen, un baute dei Firma mit väl Maut un Glück tau `n richtiget Imperium up. Hei har dat Handwark vanne Pieke up lernt. Twei Dinge wassen för üm wichtig:
1.Nich dei Bau van `ne Maschin` bring di dat Geld; nee, bloß dei Verkoop.
2.Wullt du gaut verkoopen, dann moss du dei Lüe wat anbeien, wat ehr würklick äöwertügt.
Inne 30er Johrn, do is üm wat Besünneres glücket. Dor häff hei sogor ein Patent drup krägen. Dat was dei Maohlmöhlen. Dat was ein „Kassenschlaoger“, dei bit hen nao Ostpreußen un Italien verköfft wüdd. Up sien Reklaomezädel stünd sogor dat Bild van`n „Olen Fritz, den Preußenkönig“ mit uppe. Man vertellt sick so ünnere Hand, wenn dei Möller van Sanssouci eine AWILA-Mäöhlmöhl`n hat har, dann har hei disse liesen Mäöhl`n nich maol hörn kunnt. Har woll wohr wän kunnt off nich? Anton Witte was inne Gemeinde hoch anseihn. Hei har dat jao uck tau wat bröcht.
In tweiten Weltkrieg häbbt dat uck woll dei Nazis mitkrägen. Un so schull hei nu Saoken maoken, dei för den Krieg nödig wassen un bruukt wüdden. Dat köm för üm aower äöwerhaupt nich in Fraoge. Hei bleew stur un stieselig. Un eiher, at hei sick versehg, seet hei in`t Kittken. Aower bloß drei Daoge. Aohne Alwin Witte stünd jao dei Betrieb still`. Kort dornao marschierte eine örtlicke Nazi-Truppe in sien Büro. Sei wullen üm mächtig ünner Druck setten. Hei schmeet dei Truppe achtkantig rut. Un süh dor: Anton Witte köm wedder in `t Kittken. Allerdings bloß wedder för korte Tied. Uck bi dat drütte Maol häff hei sick nich ünnerkriegen, bögen laoten. Hei bleew stiewnackig un stur. Läöterhen vertellte hei dann, dat hei, dei ehrlicke Anton Witte ut Lastrup, in sien Läwen all dreimaol in `t Kittken seeten häff.