Moin un hartlick Willkaomen in usen Kespel Lastrup!
Dat is jao wunnerbor, datt gi jau bi us maol ümmekieken willt. Ick kann jau verspräken, dat gi dat richtig maokt häbbt. Use Kespel ligg midden in `t Ollenborger Münsterland. Dat is dei beste Stäe up Ern mit masse Natur. Dorup sind wi bannig stolt. Aower hier find man noch väl mehr, nämlick eine urole Kulturlandskup, dei all Duusende van Johrn olt is. Dat sind dei Hünengräber un Wehranlaogen in usen Kespel van oltsher. All tau dei Tied vanne Karolinger Könige giff dat hier urole Buurskuppen. Aower genauso interessant sind dei Wuddeln van dei olen Geschichten un Saogen. Hier, bi us in Ollenborger Münsterland, gaiht dat kommaudig tau. Un dat is wisse nich wat Leipes. Man häff un nimmp sick Tied taun Naodenken un bruukt nich jüchtern. Dei Lüe laotet dat sinnig angaohn un sind aower aaltied fliedig taugange. Man kennt sick hier un kummp mit`nänner gaut -off nich so gaut- ut. Äöwerall giff dat Hillige un Schleitkefidels.
Inne Naoberskup wedd tauhoope fiert, schnackt un dat Ole van Fräuher pflägt.
Worher ick dat aals weit? Och, ick häbb mi jau noch nicht vertellt, weckerein ich bin. Ick heit Alfons Möhlenkamp un was väle Johre Schaulmester in Lastrup. Väle Kinner seeten vör mi uppe Schaulbank. Ick häbb versöcht ehr wat van Gott un dei Welt un dei Umwelt bitaubringen. Tja, un at sei vanne Schaule entlaoten wassen, häbbt ick se tiedlang nich mehr inne Künne hat. Faoken kömen sei nao Johren trügge nao Lastrup. So kunn ick bi so manche Läwenslinie dorbi wän.
Dat Bild vanne Läwenslinie bind`t un knüppt us tausaomen. Dortau hört uck aale dei, wecker vör us in Kespel Lastrup läwet häbbt.
Kumm mit! Laot`t jau nich lange nödigen. Wi willt us nu tauhoope för poor Läwenslinien in Lastrup up`n Padd maoken.
Un well weit? Villicht gaiht dei Spauer jao direkt tau jau sülwes.