Och, is dat nich wunnerbor?
Dit moje Huus, midden in `t Hart van Lastrup, is ein echten Grund hierup stolt tau wän.
Van 1988 bit 1990 in Wiehnachtsmaond kennen aale Lastruper dat Bauwark bloß at „Huus Meiners“. Dat köm so: För `ne korte Tied was dat Raothuus dorhen ümmetrocken. Dat ole Raothuus was inne Johre kaomen un möss saniert wern. Aff 1991 waohnten dann Lüe in dat ümmebaute Huus Meiners.
Aower 20 Johr läöter rögde sick wedder wat in Lastrup un uck för dat Huus Meiners, inne besten Wohnlage. Lastrup wüdd in dat „Dorferneuerungsprogramm van `t Land Neddersassen upnaohmen. Dat geew önnlick Geld för dei Gemeinde. Mit dit Geld schull dat nu in Lastrup noch schöner wern. Dortau hörde natürlick uck dat Huus Meiners. Dei Gemeinde wull dat Huus koopen. Dei Frau, dei dat Huus hörde, wull dat bloß anne Gemeinde verkoopen, wenn aale Lastruper Koppels sick dor tauhoope tau Fiern un Versammlungen droopen kunnen: „Ein Huus för aale.“ Un genau dat harn dei Lastruper in`n Koppe. Dat passte aals. Un so köffde 2014 dei Gemeinde dat Huus Meiners. Dat Geld för dei Dorferneuerung/Verschönerung möss so anleggt wern, datt dat Ole at Denkmaol noch gaut tau seihn was. Dat is heller gaut glücket.
Vandaoge is dat Meiners Huus ein Oogenstäker. Dei Lüe schnackt stolt van ehr „Börgerhuus un Kulturschüern.“ Dor is richtig wat Los. Dei Heimatverein Lastrup häff dor uck sien Archiv. In knibbeliger Arbeit häff hei dat Ole aals tauhoopestellt. In dit Huus kanns du aals finnen un naokieken. So uck dat, wat fräuher was un ganz väl van hütdaogs. Dann weit dei nächste Generation mehr äöwer dat Läwen vanne Lastruper.