Kanns du di dat vörstellen? Eine Zigarrenfabrik at Raothuus? Un dorut kummp in Lastrup sogor Damp ute wieten Welt? Aower dat was so!
Dei Familie Hammel, dei all siet ole Tieden hier läwte, har dat all inne Näsen. Sei mök eine Zigarrenfabrik aopen. Jao, Rooken, dat was för dei rieken un vornähmen Lüe. Well wat tau Rooken har, dei gült wat. In 19. Johrhunnert köm immer mehr Tabak mit Schippen nao Brämen un Hamborg. Mit Tabak un Zigarren wüdd gaut Geld verdeint. Dei Tabak möss jao uck noch tau Zigarren verarbeitet wern. Dat kunnen dei Brämer un Hamborger alleine gor nich mit ehre Industrie packen. Un so hörte dat uck dei Familige Hammel in Lastrup un baute eine Fabrik. Mit dat Dreihen van Zigarren kunn man gaut Geld verdeinen. Millionär kunn man dor nich mit wern. Aower dat Zigarrendreihen kunn man jao van tauhuuse ut maoken. Dat harn uck dei Lastruper spitzkrägen. Nu verdeinten sei sick dormit in „Heimarbeit“ bäten mehr Geld. Dat was genau dat Richtige. Denn, van dei armseligen, suuren Landwirtschaft kunnen wecke nich läwen.
Gägen Enn van `t 19. Johrhunnert ännerte sick dei Arbeitswiese mit dat Dreihen van Zigarren. Nu stünd man inne Riege an Arbeitsdischk. Taueierste wüdd ut dat schluffe (feuchte) Tabakblatt dei Middelrippe rutschnäen. At Tweitet wüdd ut Inlaoge un Ümblatt dei rohe Form vanne Zigarre maokt. In nächsten Törn wüdd ein gauet Tabakblatt genau at Deckblatt för dei Zigarre tauschnäen. Disse Upgaobe har meistied dei Zigarrenmaoker, dei dat heller best kunn. Nu leggte man dei Zigarren in eine Hohlform ut Holt, wor dei Zigarren genau drinpassten. Sobold dei Hohlform vull was, wüdd dei Deckel daoldrückt. Dei Zigarren schull`n jao eine gaue Form häbben un faste wän.
Taulessde kreegen dei fardigen Zigarren noch `ne fiene Banderole mit Stüerteiken üm ehrn Buuk. Genauso möt wi us dat hütdaogs in use Raothuus vörstellen; nämlick dor, wor dei Familije Hammel sülwes nich waohnt häff. Dat was eine lüttke, aower fiene Zigarrenfabrik, dei nu dei Heimarbeit lichter mök un „rationalisierte.“
Anfang van `t 20. Johrhunnert kunn dei Hammelsche Fabrik nich mehr mit dei ännern groten Zigarrenfabriken mitholl`n. Inne 1930er Johr trück do dei Gemeindeverwaltung Lastrup in dat Huus.