Mien Mester kann stolt up dat ween, wat he hier henkregen hett! De Kanzel, de Dööpsteen, dat Orgelprospekt – un disse wunnerbar Altar! Ok an mennig Stäen in’t Ollnborgsche un an de Ünnerwerser hett mien Mester Ludwig Münstermann wat bewarkt. Man disse Altar in de Slottkar Varel, de na’n Heven tolopen deit, is nu jüst dat Herrlichste, wat mien Mester överhaupt maakt hett. He hett wahrhaftig dat Evangelium in’t Bild sett. Dat Heil un de Erlösen in Jesus Christus, usen Herrn, kannst hier van de Kripp bit to dat Krüüz un dat Upstahn in best orntlich un vullkamen maakt Art un Wies bekieken!
Mien Mester hett sien grote Warkstäe in Hamborg, man de Ollnborger Grafen höört to sien leevsten Kunnen to. Un ik kann de hoogen Herren verstahn.
Denn de Figuren van mien Mester sind van nadrücklich Lebennigkeit un van höögsten Utdruck. Dat Utarbeiden van sien Wark is nipp un nau dördacht un hett depe Wuddeln in de Lehr van’n Gloven van Dr. Martin Luther.
Klaar, kann he nich jed enkelt Ornament un jed Figur van egen Hannen sülfst maken, man he hett allns up eenmal in’n Blick. Künnig Gesellen un siene Jungs gaht em stadig to Hannen, so wi veel Anfragen to glieke Tiet an de Mester in sien Warkstääd beracken köönt.
De Updrag för de Slottkark in Varel keem van Graf Anton II. van Ollnborg un Demost. He is en beten gediegen Keerl, man mit en groten Schatull. Up dat moie Slott in Demost sitte he mit en ganzen Koppel van 11 Kinners. Dor hett he woll Grund genoog sien Herrgott en Dank to wiesen.

De Slottkark weer siet dat 12. Jahrhunnert de Hauptkark van een van de Viddels van dat ole freesche Rebett Rüstringen. In’t 14. Jahrhunnert hebbt de Hööftlinge, de hier seten, üm de ole Wehrkark en Steenhus upricht. Dat is na 1481 in’n Egendoom van de Ollnborger Graf Gerd övergahn.
En Spier van dissen sagenhaften Grafen kannst ok in en Fresko binnen van de Chorraum finnen. Dor kneet de as grulig Roofridder bekannt Gerd daal un beedt in unwennt demödig Positur: O Herr, was me gnaedig.
Achteran hebbt de Ollnborgers en ganzet Slott rund üm de Kark boet. Dorbi is de Kark för de Gottesdeenst van de Varelers jümmers apenstund. Dat besünner Inventar ut de Warkstäe van de Bildhauer Ludwig Münstermann is in de Jahren 1613-1618 maakt wurrn un dat lohnt sik, dat mal antokieken.
Dat herrschoplich Slott is middelwiel al langen nich mehr dor. Allns wat dorvan överbleven is, is de Naam „Slott“-kark. So as in ehr Anfangsjahren hett se de ganze Grund üm ehr to weer för sik ganz alleen.