Ja, wat schallst denn dorvan nu seggen?! De Graf van Bentinck, en Nakamen van kröönt Herrschers, de Reichsgraf un Regent van Varel heiraadt. De Saak is an sik ja gar nich mal delikat. He is ja nu al vele Jahr Wittmann. War schall he nu kien neie Ehe ingahn? Man ik segg Jo wat: De Graf wull en börgerlich Fro heiraadten! Sarah Gerdes is de Naam van de gode Fro. Se is de Dochter van en Moorkolonist hier ut us Kuntrei! Schall man dat glöven? Un nich blots dat! He heiraadt dat Frominsch man nu eerst, nadem de beid al över Jahrn en Verhältnis harrn. En „Gewissensehe“ hett de Graf dor jümmers an seggt. Dree Kinner hebbt se över de Jahrn al kreggen. All unehlich. Sodom un Gomorra segg ik blots! Sarah Margarethe Gerdes ut Steenhusen ward nu an’n Gottsdisch de Gräfin van Aldenburg-Bentinck. Na, wenn dat man kien Upstiegen is!

De Familiengeschicht van de Aldenburgs-Bentincks is al van Anfang an vull mit Schandalen. Graf Anton Günther harr en Liaison mit de veel jüngeren Elisabeth von Ungnad. De is in dat Dör’nanner van de Dartigjahrigen Krieg na Ollnborg kamen. Dat Nablievels van disee Tête à Tête weer de Jung Anton, wat de eenzig Nakamen van Anton Günther bleev. De Graf harr em all to geern de Grafschaft achterlaten, man dat weer gegen all dat Recht. Tominnst kunn Anton Günther em de Herrschop Kniphusen un Varel sekern. Dorto is Anton in de Reichsgrafenstand insett wurrn un kunn sik van nu an „von Aldenburg“ nömen. So hett he en beten Glemer un Schien van en gräflich Residenz na Varel. Man de Aldenburgers is dat Glück ünner de Hannen weglopen. Anton is. Anton is van us gahn un hett kien Arv achterlaten. Man sien Fro, de up en Kind töövte, is achterbleven. Verwunnerlich weer dat, dat se dat henkrgen hett, dat ehr Jung 1706 as Anton II dat Arvdeel van sein Vadder övernehmen kunn. Dorbi is se gegen veel Wedderstand anlopen. Man de Herrschop weer to lüttjet, dat se mit ehr Wirtschop överleven kunn. Dorto kemen de Verluste van de Wiehnachtsfloot van 1717. Anton brukde nödig well, de em Geld geven kunn. De hett he den in de nedderlandschen Grafen Wilhelm van Bentinck funnen. De hett em ok glieks sien Dochter Charlotte Sophie mit an de Hand geven. Ut disse Verbinnen kaamt woll twee Jungen, man de Ehe is trurig verlopen un bald ok ganz ut’nanner gahn. De Gräfin föhlde sick denn free. Se hett denn Vermaak an de geistig Uttuusch funnen un vele Breven to Friedrich de Großen un Voltaire schreven. Laterhen is se denn an de Hoff van Bückeburg trucken. Dor hett se vele Jahrn as Favouritin van de Leev ut ehr Jugendtiet Wolfgang von Schaumburg-Lippe leevt. Em hett se ok twee Kinner schunken. Man dat Wolfgang to glieker Tiet mit ehr Cousine verheiraadt weer, hett se woll nich stört.
Ehr Nakamen hebbt denn de Nafolg ut dat Hus Bentinck övernahmen. Dor hett denn de Reichsgraf Wilhelm Gustav Fridrich in’t Jahr 1816 mit de Heirat van de börgerlich Sarah Gerdes de tokamen un ok letzt Schandalgeschicht schreven. 1854 is denn de Herrschop in Varel an dat Grootherzogdom Ollnborg övergahn.