Van Harten willkamen in ´n Naturpark Dümmer. Hier giff dat veel to seihn un to beleven: Mauer, Strom un Bäken, Barge un wisse klor, den Dümmer See. De Naturpark geiht weg över de Grenz van Neddersassen na Nordrhein-Westfalen un is 1.122 Quadratkilometer groot.

De Stemweder Barge in ´n Südwesten, de Dammer Barge in ´n Westen un de Kellenbarge in ´n Osten reckt sik her, bewassen mit Busck un Holt, över fuchtigen Grund. Wecker hier över Päddkes un Wege wannert, krigg een Rieg van Planten un Deerten to seihn.

De Deel in ´n Osten van ´n Naturpark is ton gröttsten Deel Mauer. Dat Deefholter Mauer mit 15 Hoch- un Leegmauerplacken maakt bold een Viddel van ´n den heelen Naturpark ut. De wietlöfftigen Mauerplacken hett man de Natur wedder trüggegeven. Se sünd vandaag van international Bedüüden för Schuul van Vögels. Siet Johre holt hier ton Bispill jeds Johr an de 100.000 Kraankvögels Rüst. 10000e van wille Goosen un Aanten ut de arktischen Regionen blievt hier över ´n Winter. De Gegend is uk bekannt dorför, dat verscheeden Vögels so as de Himmelszäge un de Tüütvogel hier ton bröden herkaamt, Vögels, de in ehrn Bestand aaltied minner wedd. An ´t Euwer van ´n See find sik de swatte Kier un de Reitmeeskes. Sogar Fisk- un Seeadler hebbt hier ehr Revier. Mit Stollt kann een seggen, dat de Naturpark Dümmer mit to den Placken hört, wor ´t an ´n meisten Soorten Planten un Deerten in ganz Mitteleuropa geven deit.

Man in Midden van aalns, de Dümmer. In ´n Vergliek mit anner Water van siene Grötte is disse See man wat anners: he is man good een Meter deep, man kann bold överall stahn: wat den Watersport angeiht, föhlt sik hier de Profis nett so good as de, de ehre ersten Erfohrungen maaken willt. Sacht un ruhig flütt de Stroom Hunte van ´n Süden nah ´n Nörden dör ´n Dümmer-See un ladet uk in, mit ´n Kanu een beten van de Gegend ümto antokieken. De Hunte bring dat Water för den Dümmer-See mit.

Dat dat hier in de Natur un Landskup so veel to bekieken gifft, is de Grundlaag för den Tourismus. Hier kann sik jedeen fein verholen. An verscheeden Stäen kann man up ´n Plattform kladdern, wiet utkieken un de Vogelwelt in ´t Oog nehmen. Een ganz besünner Beleven is ´t, wenn in ´n Harfste de Kraankvögels to Rüst dorhenkaamt. Will een dör den Naturpark wannern, dann finnd sik över 300 Kilometers Päddkes un Rundwege. Un mit de Fiets geiht dat över 700 Kilometers Radwege dör den Naturpark. Un dann gifft dat noch wat ganz Besünners, de Mauerbahn. In fröher Tieden wüdd se bruuket, üm den Törf to transporteern, nu tuckelt se mit Besöökers dör ´t Mauer. Nich to vergeeten, de Deefholter Mauerschnucken. De mott een sik ankieken. Se sünd vandaag selten worn. Man siet dat 14. Jhd. helpet se mit, dat dat Mauer pleegt un erhollen wedd.

Uk wenn een nich good to Beene is, nich good loopen kann, kann een den Naturpark Dümmer van sien moien Sieten kennenlernen un beleven. Bi de Tourist-Info Dümmerland in Lembruch kann een sik den elektrischen Geländerullstohl „ZOOM“ mit All-Rad-Antrieb utleihnen.

Wi snackt nich blots van Barrierefreiheit.

Wenn een dorto gern noch mehr weeten will, wat barrierefreie Angebote in ´n Naturpark angahn deit, dann kann een up use homepage nahkieken unner: www.duemmer.de off www.naturpark-duemmer.de