In olle Tieden gav dat tüschen de Oldersümer un de Emder en Krieg üm Beer. Dormit dat klar is: dorbie gung dat neet üm dat Drinken van´t Beer, nee, dat gung um dat Verköpen.

De Lüh in Oldersüm wassen passioneerde Beerbrauers. Dorüm worde de Markt, de in de Ort regelmäßig offhollen worde, ok „Hoppmarkt“ nöhmt. Also, de Markt op de Hoppen inköfft wörde. Un dat Beer in Oldersüm schöll ok good to drinken wesen hebben. Dat Emder Beer harr gor kien goden Ruf, dat wörde van de Lüh as „Jauche“ beschimpt. Doran kanns all marken, dat de Lüh sick nich grön wassen. Man dat was´t noch nich. De Emder setten en Akzise op da Beer ut Oldersüm. Dat meent, se kloppten op dat Beer en Bült an Stüür op un de was hogeder as de för her egen Saken. Doröver kwamen de Minsken hier önlick in Brass. Denn so kwam dat, dat dat Beer ut Oldersüm för de Lüh völst to düür was. Dat gung so wiet, dat de Arger över de hoge Stüür ok Graf Johann van Ostfreesland to Ohren komen dee. In dat Johr 1580 schickte he en Beschwerde noh Emden. Dorin stünn, dat he mit siene landesherrschaftlicke Autorität de Akzise ünnerseggte.

Man, dat was natürlick dat Richtige för de Emder Beerbrauers. Nuh gungen de op de Barrikaden. Denn nuh worde blots noch her Beer mit Stüüren belegt un dat in Oldersüm nich mehr. Un sünner de Stüüren kunn man de Kosten för dat, wat ut dat Stadtsäckel to betalen was, nich beglieken. Un wiel man sick nich ennig wörde, gung dat vör Gericht.

De kaiserlicke Kommission kreeg dat to lesen un ok de Vertreders van de Generalstaaten van de Neederlande. Un dat in een Tied, as de Möhlen van de Justiz vööl langsamer mahlten as vandaach. Un so wachten de Lüh op dat Urdeel so lang, dat dat kieneen van se noch to Leevtieden mitkriegen dee.

In disse Situation wullen de Lüh avers wieder Beer drinken. Un so kwam dat damals to en Bült Targerreien. As bie Mönnikeborgum, dat liggt wat nördlick van Oldersum, de Brügg över de Grove baufällig was, passerde dit. Man leet en neie Brügg bauen. Man de möken se so, dat de Fahrrinne dorunner en lütt beten schmaler utfallen dee as bie de olle. Dormit harrn de Emder Beerbrauers avers nuh en Problem. Se halden her Drinkwater för dat Brauen ut dat Binnenland över disse Waterstraat. Un nuh kwamen se an disse Stee nich wieder. Dat was nuh en Sackgasse worden. Wenher dat man nich Absicht wesen is! Un dat Beer wörde damals, so as anner Waren ok, in de Waag van Oldersüm to´t Weegen bracht. Vandaach kanns dor de stimmungsvulle Pension „Slapen un Eten“ finnen. Dat is de ostfreeske Version van „Bed and breakfast“.