Oldersum

De Junkersweg

Audio

Text

Ha! Ick bün Wiard Haiken, de neie Baas van Oldersüm. Noh en lange Riech van Kriege is nuh de olle Burg van de tom Broks op mie övergahn. Ok wenher dat nich ganz sünner Striet so komen is. Focko Ukena, de olle Foss, wull sick Oldersüm egenlick ünner den Nagel rieten. Man sünner mie. Dat hett he nuh dorvan. Mit Piraten hett he sick tosomendohn. Un dat was ja nuh genau dat Richtige för de Peepersacken ut Hambörg. Ick was schlauer, ick stunn an de Siede van de Hanse un hebb mie dat mit de torecht makt un kämpft. Un dorüm bin ICK nuh de Baas in´t Huus!

Man, nuh will ick mie erst mal in mien neie Burg ümkieken. Dat sünd nömlick twee groode Steenhuusen de disse groode Feste hett. Un umto löpt en schützende Graft. Seker, noh disse Kriege mot dat een of anner wedder klar makt worden. Man, wenher dat schafft is, schall kieneen mehr mien Huus in en Stürm erobern. Ick hebb hört, dat dat Verlies ünnern in de Torn besünners deep is. Ha, dor schallen sick de Lüh mol vörsehen, dar van de kieneen dor  runner mott.

Viellicht givt dat hier in disse Burg joh noch en paar olle Schätze. Dat wörde mie jüst topass kamen. Hier schall dat en ollen, unnerirdischen Gang geven, de unner dat Sieldeep langes bit noh de Karke lopen schall, of bit to de Stee, wor noch bit vör een paar Johren de tweede Burg stunn. De furchtsame Knechte hebben mie vertellt, dat dor kieneen hengohn schall, wegens de bösen Geister de dor spuken. Dat is doch man bloots Geplapper van olle Wiever. Wohrschienlick willen disse Lumpen blots, dat man nich achter dat Geheimnis komen deiht. Viellicht liggt dor joh de Schatz!

Hey, Du, Knappe! Wor is de Ingang to dat unnerirdische Gewölbe? Red nich lang! Wies mie de, wor is he? So, nuh man op mit  de Döre, un giv mie de Fackel! Du blievst schön hier! Kieneen schall mit mie gahn, dat was joh wal noch mojeder! Wat ick finn, dat schall ok mie allennig hören! Genau, makt man de Döre achter mie wedder to! Ick kam hier wall allenig klar!

Man, was is dat dunkel hier, un natt un kold!

Wat was dat? Wer is dor? Ick bün Wiard Haiken, de Baas van Oldersüm! Kumm drock ruut un wies die!

Düwel, miene Fackel, se is utgahn! Is dat dunkel, dat is bannig dunkel hier!

Helpet mie, haalt mie hier sofort wedder ruut!!

Wie mööt uns üm Wiard Haiken kiene Sörgen maken. Wenher he disse unnerirdische Gang langes gahn is, dann is he in een Stück wedder rutkamen. He is nömlick de Stammvader van de Familie, de sick noh her Sitz „van Oldersüm“ nömde un siet dat 15. Johrhunnert dor bold tweehunnert Johr regeerde.

Of dat de geheimnisvulle Gang un de tweede Burg in Oldersüm geven hett, dat weet vandaach kieneen mehr so genau. Man, de Ollen in Oldersüm kennen bit vandaach noch de „Junkerswech“ , een Stück achter de Seileree. Man kann annehmen, dat dat  över dat Siel en Zugbrücke geven hett, över de man in de Burg damals rinkomen kunn.