Ja, wenn dat Hus vertelln kunn, dat harr sachts een paar Döntjes up Lager! Man dat kannt’t beduert nich, so mööt wi dat anners maken: Ik vertell Se wat över dit Hus.
Dat Degodehus is nich blots een van de moiesten Hüüs in Ollnborg, man ok een van de öllsten. Up een Kupperstich van Pieter Bast, de de Stadtansich van 1598 wiesen deit, is dat al achter dato le Rathus an de Kant to de Kleinen Kirchstraße to kennen, man dor sehde dat noch wat anners ut. Dat weer ok gar nich möglich, denn dat üm 1502 upboete Huus hett erst 1617, also wat an de 20 Jahr achter de Bastsche Kupperstich sien Prachtgevel kregen.
So as in anner Städen ok, hebbt de Börgers mit veel Geld un Macht ehr Hüüser moi utstaffeert direkt an’n Markt boet. So steiht dat Degodehus van sien Laag woll för de Typ van’t Patrizierhus, man nich unbedingt van sien Bomaterial. Nich veel Hüüser ut Ollnborg weern ut Steen maakt. Een de een Reis maakt hett un an’t Enn van’t 16. Johrhunnert in Ollnborg afstegen is, vertellt us, dat de Stadt ut schier Lehm boet is, dat heet ut Fackwark. Man tominnst hett sick dat al dörsett, dat de Dacken ut Ticheln deckt werrn mööt, een groot Vördeel gegenöver de strohdackt Hüüser, de allto licht brannt hebben. Liekers is dat in Ollnborg to een groot Stadtbrand kamen: 1676 hett de Blitz glieks an dree Stäen to gliekertiet inslaan un dat Füer leeg een groot Deel van de Stadt in Schutt un Asch. – Man nich hier, denn de Süddeel van de Stadt mit de Markt, de Lambertikark un dat Schlott sind dor ümtokamen. Een Grund mehr, warüm dat Degodehus een besünner Kleinod van Ollnborg is. Dat is een van de Hüüser, de stahnbleven is, un dat ok al stahn hett, as de Stadt noch een gräflich Residenz ween is. Un klar hett dat Hus ok wat mit de Grafen to doon, sogaar mit de bestbekannten, Anton Günther. He hett dit Hus sienen Geheimen Rat Mylius von Gnadenfeld to Hochtiet schunken. So een Geschenk hett he ok verdeent, weer he doch een van de wichtigsten Diplomaten Anton Günthers ween, de sienen Andeel dor an hatt hett, dat Ollnborg van de grulige 30jährig Krieg verschont bleven is. In’t Degodehus kannst ok noch een anmaalt Holtdeck ut de Tiet finnen. De wiest in sien Allegorien ut de Tiet de veer bekannt Kontinenten – Australien fehlde to de Tiet noch.
Üm 1800 weer de Smack van de Tiet över de Malerei van’t Barock henweggahn un dat moie Bilderwark is ünner een eenfach Stuckdeck verswunnen. Erst 1992 hett man bi’t Neimaken de bemalt Deck wedderfunnen.
Siet 1860 hett Wilhelm Degode ut Jever mit sien Familje in dat Hus wahnt, dor is de Naam denn herkamen. Sien Jung Georg Wilhelm Degode is in dat Hus to Welt kamen. He schull egens de Kaffeerösterei van sien Vader övernehmen. Man so as dat upstunns togeiht: Dor harr he kien Vermaak an un is een bekannt Landschupsmaler wurrn.
Vandagen is dat Degodehus jümmers noch een anfraagt Geschäftsadress in’t Hart van Ollnborg – un dorto ok noch een Ogenweid.